Aurtengo pandemiak agerian utzi du baliabide didaktikoak digitalizatuta eta sarean izatearen garrantzia. Euskara Atalak bere ekarpena egin nahi izan du Nafarroako ahozko ondaretik jasotako altxor hori irakasle eta hezitzaile guztien eskura jarriz. Xaldun Kortin, Jolastu gurekin! egitasmoak haur txikiekin lantzeko kantuak eta kontuak (eskuekin eta behatzekin jolasteko, trostan ibiltzeko, taldean jolasteko, memoria lantzeko, lo egiteko,…), ipuinak eta haur hizkeraren hiztegia biltzen ditu. Bereziki baliagarria da, beraz, Haur Hezkuntzako irakasleentzat.
Euskokultur Fundazioko patronatukide eta Bigarren Hezkuntzako irakasle den Maite Lakar Iraizoz herriz herri eta etxez etxe ibili zen, bertze anitzekin batera, gure aitona-amonen bizipenak biltzen. Horien artean zeuden garai batean etxeko txikienen belarriak gozatzen zituzten kantu, kontu, jolas eta ipuinak. Lekukotasun horiek oinarri hartuta, bigarren fasean Xaldun Kortin, Jolastu gurekin! argitalpen multimedia prestatzeari ekin zioten Lakarrek berak, Patri Arburuak (Bortzirietako Euskara Mankomunitatea) eta Labrit Ondareko Itziar Lurik nahiz Gaizka Arangurenek. 2014ko grabazio lanetan parte hartu zuten, halaber, Nafarroako hainbat eskolak.
Anjel Lertxundi idazleak dioen moduan, “ume txikien gelak letrarik gabeak dira hasieran, letradunak pixkana-pixkana. Hitzaren gozoa eta poza hain modu bat-batekoan sentitzen eta adierazten den giza sasoirik emankorrenaren leku eta lekuko behar lukete izan gelek: umeak hitzarekin jolasean, hitzarekin kantuan, hitzarekin antzezten, hitzarekin dantzan…”.
Ahalegin horretan bidelagun izanen gaituzue. Katea ez dadila eten, egungo eta etorkizuneko umeek ere deskubri eta goza ditzaten hitzaren poza eta magia.
Utzi erantzuna